ކައުންސިލް އިންތިޚާބަކީ ރަށެއްގެ ނުވަތަ ސިޓީއެއްގެ ކުރިމަގު ބައްޓަންކުރުމަށް ރައްޔިތުންނަށް ލިބޭ އެންމެ މުހިންމު ފުރުޞަތެވެ. މި އިންތިޚާބުގައި ވޯޓު ދިނުމަކީ ހަމައެކަނި ސިޔާސީ ޙައްޤެއް ނޫނެވެ. އެއީ ދީނީ ގޮތުންނާއި ޤައުމީ ގޮތުން އުފުލަންޖެހޭ ބޮޑު އަމާނާތެކެވެ. ސަރުކާރަށް ނުވަތަ ވަކި ޕާޓީއަކަށް ވޯޓު ދިނުމުގެ ބަދަލުގައި، އިސްކުރަންވީ ”ހެޔޮވެރިކަމުގެ“ އުޞޫލުތަކަށެވެ.

އިސްލާމީ ޝަރީޢަތުގައި މަޤާމުތަކަކީ އަމާނާތެކެވެ. ކީރިތި ޤުރުއާނުގެ އަންނިސާ ސޫރަތުގެ 58 ވަނަ އާޔަތުގައި މާތްﷲ ވަނީ އަމާނާތްތައް އޭގެ އަހުލުވެރިންނާ ޙަވާލުކުރުމަށް އަމުރުކުރައްވާފައެވެ. ވީމާ، ވޯޓު ދޭއިރު ބަލަންވީ އެމީހެއްގެ ކިބައިގައި ހުރި އަމާނާތްތެރިކަމާއި (Integrity) އަދި އެ މަސައްކަތް ކުރުމުގެ ޤާބިލުކަމަށެވެ. ވަކި ޕާޓީއަކަށް ނިސްބަތްވުމަށްވުރެ، މި ސިފަތައް ހުރި މީހަކު އިޚްތިޔާރު ކުރުން މުހިންމެވެ.

ހެޔޮވެރިކަމުގެ ނިޒާމު (Good Governance)

ލޯކަލް ކައުންސިލްތަކުގެ މަޤްޞަދަކީ ރަށުގެ ކަންކަން ރައްޔިތުންނާ ގާތުން ހިންގުމެވެ. ހެޔޮވެރިކަމުގެ ނިޒާމެއްގައި ހިމެނޭ މުހިންމު ބައިތަކަކީ

• ދެފުށް ފެންނަ ގޮތަށް ކަންކަން ކުރުން (Transparency)
• ރައްޔިތުންނަށް ޖަވާބުދާރީވުން (Accountability)
• ރަށުގެ މުޞްލަޙަތު އިސްކުރުން (Public Interest)

ލާމަރުކަޒީ ނިޒާމެއްގެ އެންމެ ބޮޑު ބޭނުމަކީ މަރުކަޒީ ސަރުކާރަށް ބަރޯސާނުވެ، އަމިއްލަ ރަށުގެ ތަރައްޤީގެ ތަސައްވުރު އަމިއްލައަށް ކުރެހުމެވެ. ވީމާ، ވޯޓު ދޭންވީ ސަރުކާރު ހިތްރުއްސާކަށް ނޫނެވެ. އޭގެ ބަދަލުގައި، ރަށުގެ މައްސަލަތައް (މިސާލަކަށް: ގޯތިގެދޮރު، ކުނި މެނޭޖްކުރުން، ވަޒީފާ) އެންމެ ރަނގަޅަށް ޙައްލުކޮށްދެވޭނެ ފަދަ ޢިލްމީ އަދި ފަންނީ ޤާބިލުކަން ހުރި މީހުންނަށެވެ.

އިސްލާމީ ވެރިކަމުގެ ނިޒާމުގެ އެންމެ މުހިންމު އެއް އަސާސަކީ ”ޝޫރާ“ ނުވަތަ މަޝްވަރާ ކުރުމެވެ. ކައުންސިލަރަކަށް ހޮވަންވީ ރައްޔިތުންގެ ބަސް އަހާ، ރައްޔިތުންނާ މަޝްވަރާކޮށްގެން ކަންކަން ނިންމާނެ މީހެކެވެ. މީސް މީޑިއާގައި  ރައްޔިތުން  ފާޅުކުރާ ބިނާކުރަނިވި ފާޑު ކިޔުންތަށް ބަލައިގަންނަ މީހެކެވެ. އަދި ބޮޑެތި ޕާޓީތަކުގެ ނުފޫޒަށްވުރެ ބޮޑަށް، ރަށުގެ ކުދި ބޮޑު އެންމެންގެ އިޙްސާސްތައް ދަންނަ މީހަކެވެ.

ކައުންސިލް އިންތިޚާބުގައި ވޯޓު ދިނުމަކީ ތިމާގެ ރަށުގެ ކުރިމަގު ކަނޑައެޅުމެވެ. އިސްލާމީ އުޞޫލުތަކާއި ހެޔޮވެރިކަމުގެ ހަމަތަކަށް ރިޢާޔަތްކޮށް، އެންމެ އިޚްލާޞްތެރި، އަމާނާތްތެރި އަދި ޤާބިލު މީހުން ހޮވުމަކީ ކޮންމެ ރައްޔިތެއްގެ މައްޗަށް އޮތް ވާޖިބެކެވެ. ރަށުގެ ތަރައްޤީ އޮތީ ތިޔަބޭފުޅުންގެ ނިންމުމުގެ މަތީގައެވެ.